" Kampus UIN AR-Raniry "

" Kampus UIN AR-Raniry "

Assalamualaikum pujoe keu Rabbi
Seulaweut keu Nabi pang Ule Saidina
Kampus UIN jinoe ka tari
Geudong meuriti didoeng meubanja

Al-Hamdulillah meunan phoen haba
Taci raba-raba takisah jinoe
Sigoh Tsunami sang-sang lam rawa
Jinoe tarasa ka lage meuligoe

Serah teurima yang goet beubagah
Supaya beu jeulah pat-pat yang rugi
Bek na masalah uroe keu singoeh
Suapaya bek timoh deudam ngon benci

Fakultas Dakwah cukop that bagoe
Hana meugantoe ngoen geudong yang tinggi
Ibarat HP nibak zameun nyoe
Casing meugantoe yang tari-tari

Tarbiyah-Syariah-Ushuluddin ngoen Adab
Leupah that meuhat senang lam hate
Tapi meh moh sabe troek haba
Geu takot geumpa ka habeh reule

Bineh geureubang kampus na kulam ikan
Asoe didalam goet that meuguna
Ungkot meuja'e beuserta kawan-kawan
Ka jeut ta panggang makan bersama

Uroe jeh meusipreuk rata jeut sagoe
Jinoe ka meusahoe tagisa teuma
Bak geudoeng baroe pikiran pih baroe
bek taheo-taheo gadoh mita nama

Fathun Qarib meusjid geutanyoe
Teumpat meureuno aneuk Halaqah
Tajakk hai rakan mandum geutanyoe
Bek sampe laloe nibak Ibadah

Asrama mahasiswa pih ka berdiri
Meunan cit akhi ruson nawa
Cuma sampoe uroe nyoe goh na yang huni
Aleh paki-paki sampoe oeh lusa

Etnoe keuh mantoeng haba peubuhu
Kaleuh tatuju keu kampus ta cinta
Pat-pat na kureung atawa lucu
Meu ah hai Teungku kamoe jak gisa.


Pengarang/Penulis : Muhammad fajri
pekerjaan : Mahasiswa UIN Ar-Raniry Banda Aceh